هتلاقي واحد يقولك: ده بيتلف الرئة
وايه يعني , ما انت عندك رئة تانية , وفي ابحاث كتيييير بتقول ان الانسان ممكن يعيش برئة واحدة .
وهناك تطورات طبية سوف تسمح بنقل الرئة من متطوع ,
بس ما يكونش من سكان بيتك (ابنك , اخوك , اختك , زوجتك ........ ) لأن اكيد صدرهم باظ هم كمان وعايزين نقل رئة ,
والرئة اللى في صدرهم اكيد اتحرقت زي رئتك بالظبط.
واحد تاني يقولك : التدخين بيجيب سرطان
وايه يعني , معظم انواع السرطان بيتعالج دلوقت,
وبعدين في الف حاجة تانية بتجيب سرطان غير التدخين , خليها على الله وعفر.
وتلاقي اللى يقول: النيكوتين يسبب الادمان
قول له هو في حاجة اسمها ادمان النيكوتين , كل الناس اللى عندها شخصية قوية وكانت فعلا عايزة تبطل شرب سجاير نجحت في كده!!وبعدين السجاير فيها حاجات كتييييير مش بتسبب الادمان . عندك القطران مثلا
لا واللى يقولك : التدخين بيقصر العمر
ده نقص ايمان والعياذ بالله , لكل اجل كتاب , التدخين مش ممكن يموتك قبل ميعادك اللي ربنا اختاره لك ,
انما بالكتير ممكن يخليك تستمتع في اواخر ايامك بسرطان الرئة مثلا,
او يقطع صدرك من الكحة بتاعة الربو الشعبي او تصلب الشرايين ,
او بأي حاجة من الامراض اللذيذة دي ,
وتلاقي واحد كمان : التدخين حرام وتاخد بيه سيئات
بالعكس بقى ده التدخين ممكن يشيل سيئات , ما دام بيجيب امراض والواحد بيتعذب بيها في الدنيا,
يبقى ممكن السيجارة تكفر سيئاته.
التدخين يضيع فلوسك , ولادك اولى
الفقر حشمة , مش احسن من كتر الفلوس بدل ما يصرفوها في حاجة بطالة.
وبكده كل المدخنين يعرفوا يردوا كويس
موضوع: مجرد وجه نظر 
